जेठ २१, बारा । बाराको निजगढ नगरपालिका–७ स्थित जनज्योति सामुदायिक वनमा वन्यजन्तु तस्करहरूले वयस्क पोथी चित्तल मारेका छन् । 

शनिवारराती करिब साढे ११ बजेजंगलमा बन्दुक पड्किएको आवाज आएको र गस्तीको क्रममा वयस्क पोथी चित्तल मृत फेला परेको सब डिभिजन वन कार्यालय  निजगढले जनाएको छ । 

सब डिभिजन वन कार्यालय निजगढका जम्दार टीका मगरले भमरा पुलको उत्तरतर्फ भमरा खोलाको माथिल्लो क्षेत्रमा रहेको बाँसघारीमा तस्करहरूले मारेको अवस्थामा चित्तल भेटिएको बताएका छन् । 

‘हामी सधैँ ८ बजे र १० बजे दुईवटा समूह बनाएर गस्तीमा जाने गरेका छौं । हिजो राती साढे ११ बजेतिर गस्तीमै रहेको बेला बन्दुक पड्केको आवाज आएपछि लाइट लिएर हेर्न जाँदा चित्तल मरिसकेको अवस्थामा भेटियो,’ जम्दार मगरले भने, ‘एकैछिन ढिलो भएको भए चित्तल पनि तस्करहरूले उठाइसक्ने रहेछन् ।’