फागुन- १७ (एजेन्सी)

अमेरिकी राष्ट्रपति डोनाल्ड ट्रम्प र युक्रेनका राष्ट्रपति भ्लोदिमिर जेलेन्स्कीबीच भएको भेटवार्ता सहमति बिना टुङ्गिएको छ।

वाशिङ्टन डीसीमा भएको भेटमा ट्रम्पले जेलेन्स्कीलाई उनको व्यवहार र कार्यशैलीबारे चेतावनी दिएका बिबिसीले जनाएको छ । उपराष्ट्रपति जेडी भान्सको साथमा रहेका ट्रम्पले जेलेन्स्कीलाई विभिन्न आरोप लगाएपछि विवादास्पद स्थिति बनेको थियो। त्यसपछि राष्ट्रपति जेलेन्स्की ह्वाइट हाउसबाट बाहिरिए ।

वार्ताकै क्रममा अमेरिकी राष्ट्रपति ट्रम्पले युक्रेनमा ठूलो समस्या भएको र त्यसलाई जित्न जेलेन्स्कीले नसक्ने दाबी गरेका थिए । जेलेन्स्कीलाई ट्रम्पले भनेका छन्, ‘तपाईंको व्यवहार सम्झौता गर्नेजस्तो छैन । ख्याल गर्नुहोला, रुससँग युक्रेनले युद्धमा कहिल्यै जित्न सक्दैन।’

उनले जेलेन्स्कीलाई युद्ध बिरामको मनसाय छ कि छैन? भन्दै प्रश्न गरेका थिए । ‘हामी पनि युद्धविराम चाहन्छौँ,’ जेलेन्स्कीको जवाफ थियो । अमेरिका र रुसका प्रतिनिधिले हालै रुस र युक्रेनबीच जारी युद्ध अन्त्यका लागि वार्ता गरेका थिए ।

बैठक तनावपूर्ण भएर सकिएपछि जेलेन्स्कीले अमेरिकासँग खनिजसम्बन्धी र रुससँग युद्धविरामसम्बन्धी कुनै सम्झौता नहुने प्रतिक्रिया दिएका छन् ।