पुष २, नयाँ दिल्ली । अन्डरवर्ल्ड डन दाउद इब्राहिम कराँचीको अस्पतालमा भर्ना भएका छन् । मिडिया रिपोर्टमा उनलाई विष खुवाइएको आशंका गरिएको छ। तर, यसको आधिकारिक पुष्टि भने भइसकेको छैन । 

उनी २ दिनदेखि अस्पतालमा भर्ना छन् । उनलाई कडा सुरक्षामा राखिएको छ । इन्डिया टुडेको रिपोर्टका अनुसार अस्पतालमा दाउदलाई राखिएको भुइँमा अरु कुनै बिरामी छैन । 

उनको परिवारका सदस्यहरू मात्र त्यहाँ जान सक्छन्। मुम्बई प्रहरीले पनि यस विषयमा निगरानी गरिरहेको छ । मुम्बईमा रहेका दाउदका आफन्तहरूबाट जानकारी सङ्कलन गर्ने प्रयास भइरहेको छ।

यद्यपि, केन्द्रीय अनुसन्धान एजेन्सीका एक अधिकारीले भास्करलाई दाउदलाई विष खुवाइएको खबर धेरै हदसम्म अफवाह हुनसक्ने बताएका छन्। दाउदको सुरक्षा यति बलियो छ कि कुनै पनि व्यक्तिलाई उनीसम्म पुग्न कम्तिमा १५० मानिस पार गर्नुपर्ने हुन्छ ।

दाउद इब्राहिम भारतको मोस्ट वान्टेड आतंकवादी हुन् । गत वर्ष उनीमाथि पुरस्कार रकमको सूची जारी गरेको थियो। यसमा दाउदमाथि २५ लाख रुपैयाँ इनाम राखिएको छ । संयुक्त राष्ट्र संघले पनि दाउदलाई विश्वव्यापी आतंकवादी घोषणा गरेको छ । संयुक्त राष्ट्र सुरक्षा परिषद्ले सन् २००३ मा दाउद इब्राहिममाथि २५ मिलियन डलरको इनाम राखेको थियो । उनीविरुद्ध विभिन्न राष्ट्रिय एजेन्सीहरूले सम्पत्ति शुद्धीकरण मुद्दा र हतियार तस्करी मुद्दालगायत थुप्रै मुद्दा दायर गरेका छन्। 

उनले सन् १९७० मा सिन्डिकेट डी-कम्पनी गठन गरेका थिए । दाउद इब्राहिममाथि सन् १९९३ मा मुम्बईमा बम विस्फोट गराएको आरोप पनि छ । यसमा २५७ जनाको ज्यान गएको थियो भने ७०० जना घाइते भएका थिए ।

उनीमाथि हत्या, जबरजस्ती असुली, टारगेट किलिङ, लागुऔषध ओसारपसारको आरोप पनि छ । उनी हाल पाकिस्तानको कराँचीमा बस्दै आएको बताइएको छ तर पाकिस्तान सरकारले यसलाई अस्वीकार गर्दै आएको छ । 

जनवरीमा दाउदकी बहिनी हसिना पार्करले पाकिस्तानी मिडिया हाउस द न्यूज इन्टरनेशनललाई दाउद कराचीमा रहेको र दोस्रो पटक विवाह गरेको बताएकी थिइन् ।