बङ्गलादेशको विभिन्न निकायका वेबसाइटहरू ह्याक
साउन -८ (एजेन्सी)
बंगलादेशमा जारी आरक्षणविरोधी आन्दोलनका बीच बङ्गलादेशको प्रधानमन्त्री कार्यालय लगायत केन्द्रीय बैंक र प्रहरीका आधिकारिक वेबसाइटहरू द रेजिस्टेन्स नामक समूहले ह्याक गरेकाे छ ।
तीनवटै वेबसाइटमा ‘अपरेसन हन्टडाउन, विद्यार्थीहरूको हत्या रोकौँ । अब यो विरोध मात्र नभई एक युद्ध हो’ भनी रातो अक्षरमा समान सन्देश जारी गरिएको छ ।
सन्देशमा विद्यार्थीको शान्तिपूर्ण विरोध प्रदर्शनलाई सरकारलगायत राजनीतिक सहयोगीको क्रूर हिंसा र हत्याको सामना गर्नु परेको उल्लेख गर्दै अब यो विरोध मात्र नभई न्याय, स्वतन्त्रता र भविष्यका लागि युद्ध भएको जनाइएको छ ।
समूहले तत्काल ह्याकर, ओएसआइएनटी अन्वेषक र पत्रकारलाई आफ्नो उद्देश्यमा सहभागी हुन आह्वानसमेत गरेका छन् ।
‘न्यायका लागि लडाइँ शुरू भइसकेको छ , तयार रहनुहोस्,’ ह्याकरहरूले चेतावनी दिएका छन् ।